Un turismo incendiouse o domingo pola tarde no quilómetro 23,500 da autovía A-54, de Lugo a Santiago, no termo municipal de Monterroso.
O motor do automóbil ardeu, posiblemente por mor dun curtocircuíto, e as chamas propagáronse con rapidez. O sinistro saldouse sen feridos, a pesar de que o vehículo quedou calcinado.
Persoal do grupo de urxencias supramunicipal (GES) de Monterroso acudiu ao lugar co camión contraincendios para sufocar o lume, mentres que efectivos da Garda Civil de Tráfico encargábanse de regular a circulación.
O sinistro produciuse cara ás sete e media da tarde e obrigou a cortar un carril da autovía na zona onde se atopaba o turismo ata que o guindastre procedeu á súa retirada, segundo indicaron fontes consultadas por este xornal.
