A Xunta cifra en 71.000 euros o custo da extinción do incendio no Careón

A Xunta estima que os medios mobilizados para a extinción do incendio que este pasado domingo arrasou 182 hectáreas de superficie da Serra do Careón supuxeron un gasto para as arcas públicas de 71.384 euros.

O Goberno galego ha calculado esta cifra en función dos custos unitarios e do tempo de traballo dos profesionais e medios que foron mobilizados para atender esta incidencia. En concreto, traballaron nas tarefas de extinción seis axentes, 22 brigadas, seis motobombas, catro avións e catro helicópteros.

Este cálculo realízase en aplicación do Pladiga 2021, unha ferramenta que posteriormente facilita a reclamación dos gastos en procesos xudiciais contra os incendiarios. E é que, segundo indican desde a Xunta, todo apunta "á intencionalidade" deste lume, cuxo inicio se estableceu na parroquia de Moredo ás 5.27 horas do pasado domingo.

VARIOS FOCOS. O alcalde de Palas de Rei, Pablo Taboada, tamén se mostra convencido da intencionalidade deste incendio xa que, segundo asegura, "houbo varios focos e produciuse de madrugada". En todo caso, a orixe das chamas aínda se están investigando.

Tamén preocupaba se as chamas podían chegar a afectar o terreo serpentínico da Serra do Careón, cuxo hábitat se atopa moi ameazado pola actividade humana. Desde a Asociación Galega de Custodia do Territorio (AGCT) afirmaron que o incendio se mantivo afastado desta zona e que, aínda que chegase a afectala, este tipo de flora aguanta ben o lume e, ademais, "a súa rexeneración é rapida".

A Xunta dispón dos teléfonos gratuítos 085, para alertar de incendios forestais, e 900.81.50.85, para denunciar actividades delituosas incendiarias.

A CABAÑA. En canto ao incendio que o Xoves Santo arrasou o complexo hostaleiro A Cabana, tamén en Palas de Rei, os propietarios terán esta semana unha reunión para decidir o futuro destas instalacións.