Os mergulladores que se adentraron este xoves no encoro de Os Peares para buscar ao home desaparecido só acharon unha roca de grandes dimensións no lugar no que este mércores o xeorradar marcou un rastro. Por agora continúan rastrexando o río co aparello.
Un equipo especializado na localización de desaparecidos mediante a técnica do xeorradar estivo durante toda a xornada deste mércores peiteando o encoro de Os Peares entre Belesar e A Cova. Despois de varias pasadas polo leito a bordo dunha embarcación, o aparello detectou o rastro dun gran obxecto no fondo do río Miño, a 300 metros da ponte do pobo de Belesar, que se cría que podería corresponderse co coche no que o pasado 21 de febreiro viaxaba o veciño de Melide Emilio Pintor, do que non se sabe nada desde entón.
O lugar quedou marcado con varias aboias á espera de que entre este xoves chegase ao lugar un equipo de mergulladores da Garda Civil para mergullarse e comprobar se realmente se trataba do turismo que conducía Pintor na tarde de hai 13 días cando falaba a través do seu teléfono móbil coa súa esposa, quen oíu, dixo, un forte golpe contra unha masa de auga antes de perder a comunicación.
Un rastrexo da chamada localizou o sinal nesta zona de Belesar a través dunha antena de telefonía móbil que hai no lugar, por iso é polo que a procura se situase neste punto. Na xornada deste mércores, ese rastrexo cun xeorradar chegado da localidade murciana de Cartaxena prolongouse desde as dez da mañá ás seis da tarde, cando comezou a escurecer.
O operativo foi seguido por varios familiares do desaparecido, quen espera saber se o coche e o corpo de Emilio Pintor están no fondo do encoro, a unha profundidade de entre 40 e 50 metros.
Desde o momento no que a esposa de Pintor denunciou a súa desaparición foron numerosas as batidas que se realizaron ao longo e ancho do río Miño entre Belesar e A Cova. A última tivo lugar o pasado domingo, na que participaron máis de 70 voluntarios sen que se achasen restos que apuntasen un punto exacto no que puido caerse ao encoro.
O lugar onde se cría que podía atoparse o coche do melidense está próximo ao que no ano 2012 se precipitou ao leito unha monfortina que na actualidade ten 40 anos de idade, cando perdera o control do coche que conducía e tras caer por un terraplén de tres metros comezou a mergullarse no río. A monfortina tivo o sangue frío de abrir o portelo da porta, saír do coche e nadar ata a superficie para salvar a súa vida.
