O escritor e político Carlos Callón recibirá o XII premio Careón durante a próxima edición da Mostra de Teatro Amador de Palas de Rei. Durante o evento, que comezará o próximo 23 de agosto e terminará o 2 de setembro, tamén se homenaxeará ao grupo de teatro Chévere co XVIII premio Mácara.
Este martes foi a presentación oficial da decimonovena edición do festival de teatro afeccionado. Ao acto acudiron o alcalde de Palas, Pablo Taboada, e a técnica de cultura do Concello, Divina Agra. Ademais, tamén asistiron os representantes de Alentía Teatro e de Metátese Teatro, Xema Buján e Andrés García, acompañando a Alfonso García, do comité organizador do evento.
Este ano participarán un total de dez grupos teatrais, nove de Galicia e un de Pozuelo de Alarcón. O sábado, día 1 de setembro, a organización entregará os premios Mácara e Careón ao grupo de teatro Chévere e ao escritor Carlos Callón respectivamente. Tamén se concederá por primeira vez o premio Garabato, en homenaxe póstuma ao mozo palense Gabriel Barreiro Toural.
PROGRAMA. A XIX Mostra de Teatro Amador inaugurarase o día 23 de agosto ás 21.00 horas coa actuación do Obradoiro Municipal de Teatro de Palas de Rei, nas instalacións da casa da cultura. Manterase o mesmo horario e o mesmo lugar para o día seguinte, cando o actor Pedro Brandariz representará a obra Profundando na Galiza profunda. Esta última actuación conta co financiamento de Agadic a través do programa Cultura no Camiño.
A fin de semana do 25 e 26 de agosto haberá ata catro funcións. Alentía Teatro representará a obra Nas mans dos contos o sábado ás 18.30 horas no campo da festa de Santo Xusto. Dúas horas e media máis tarde, o grupo de teatro Ateneo, de Pozuelo de Alarcón, presentará A tartaruga de Darwin na casa cultural de Palas.
Iara Teatro abrirá a xornada de domingo en Santo Xusto, tamén ás seis e media da tarde, coa obra Aprendices de pallaso. A casa da cultura municipal acollerá de novo ás nove da noite a función Fíos!, representada por Metátese Teatro. A partir deste día haberá un parón de actuacións ata o mércores, 29 de agosto. Ese día, o grupo Caxigos Teatro representará Os supergaleguistas ás 21.00 horas na casa cultural. O xoves e o venres á mesma hora e no mesmo escenario chegará a quenda de Debullando Teatro, con E ti de quen vés sendo?, e de Soidade Felloza, con em Xeografía do imaxinario.
A última fin de semana de actuacións iniciarase o sábado a partir das 10.00 ata as 14.00 horas co espectáculo de Son D'aldea nos núcleos de Albá, Santo Xusto, Gontá e Gundía.
Nesta xornada tamén se entregarán varios premios de parte da organización. A Mostra de Teatro Amador clausurarase coa obra A farsa do bululú, representada polo grupo de teatro da biblioteca municipal de Antas de Ulla.
