A directora xeral da Garda Civil, María Gámez, mantivo unha reunión de traballo este mércores cos responsables da Garda Civil en Galicia, informou o Instituto Armado. Gámez tamén visitou a Compañía de Palas de Rei.
Os mandos da Garda Civil expuxéronlle á directora xeral os labores que realizan na Zona e nas Comandancias da Coruña e de Lugo, cal foi a súa evolución nos últimos anos, así como as perspectivas e plans de futuro.
A directora xeral mantivo un encontro con persoal de todos os empregos aos que felicitou polo traballo realizado, especialmente durante este último ano.
María Gámez tamén se entrevistou con algúns axentes que estiveron hospitalizados por covid-19 e cos que xa mantivo contacto telefónico durante a súa enfermidade.
Por outra banda, o pescador galego Rogelio Santos Queiruga foi condecorado pola Garda Civil con motivo do aniversario da Fundación do Corpo. Deuse a coñecer grazas aos vídeos cos que insignia a coidar a fauna mariña. Estes vídeos cos que se dedica a concienciar á cidadanía sobre o noso patrimonio natural convertéronse nun fenómeno viral.
Moitísimas gracias a @Maria2Gamez , e a @guardiacivil por este recoñecemento que se suma ao de tanta xente xa. Cando coidamos do mar non o facemos para nós mesmos, senón para todos, incluidas as novas xeracións. https://t.co/0GjxeUTxaQ
— Rogelio Santos Queiruga (@QueirugaRogelio) May 26, 2021
María Gámez destacou que Rogelio Santos e a Garda Civil comparten os mesmos valores e compromiso co coidado do medio ambiente e deulle o parabén polo seu traballo de concienciación entre a poboación.
"Es un exemplo de que todos podemos facer moito desde a nosa contorna polo coidado do medio ambiente, algo tan importante sobre todo para as nosas xeracións futuras", sostivo.
A Zona da Garda Civil de Galicia está formada por catro Comandancias -A Coruña, Lugo, Pontevedra e Ourense-, que cobren a seguridade do 94,73% do territorio galego, cunha poboación dun millón e medio de habitantes (56,11%).
Galicia conta actualmente con máis de 5.000 gardas civís destinados nesta comunidade.
Na Coruña, a Garda Civil organízase en cinco compañías, sete postos principais, 40 postos ordinarios e catro auxiliares, que dan cobertura a un total de 88 municipios da provincia.