A Deputación de Lugo informou da adquisición dunha segunda remesa de parcelas para crear no municipio de Antas de Ulla -onde se localiza o centro xeográfico da comunidade autónoma- o Parque Central de Galicia.
O presidente da Deputación, José Tomé, acompañado pola deputada de Promoción do Territorio e Turismo, Pilar García Porto, asinou este martes no Pazo de San Marcos e ante notario a escritura de compravenda de catro novas parcelas, que suman unha superficie de 13.000 metros cadrados.
En declaracións aos medios de comunicación, Tomé anunciou que "en breve" a institución provincial formalizará a compra da sexta e última parcela que falta para crear ese Parque Central de Galicia.
De feito, precisou que a venda xa foi acordada cos propietarios e a adquisición da parcela só está pendentes de que os actuais donos resolvan cuestións privadas relacionadas con herdanzas "familiares".
O investimento total por parte da Deputación para a compra das seis parcelas elévase a 120.000 euros, o que lle permitirá dispor dunha superficie total de 20.466 metros cadrados para crear ese gran "espazo público, de lecer e de natureza en torno ao Centro Xeográfico de Galicia", situado en Nugallás, que permitirá "dinamizar a economía e o emprego en Antas de Ulla".
Tras formalizar a compra da última parcela, a Deputación de Lugo redactará o proxecto para a creación do Parque Central de Galicia, onde está prevista a colocación dun monólito para sinalar o centro xeográfico da comunidade autónoma.
A previsión do goberno provincial é ter o parque finalizado en 2022.
