O Concello de Palas de Rei capturou desde marzo un total de 23 cans na contorna da aldea palense de Vilar de Ulloa (na parroquia de San Pedro de Meixide) onde os cánidos agrediron ao gando dun veciño.
O afectado, Anxo Varela Rouco, precisa que o último ataque produciuse o domingo pola noite. "Levo tres meses que non paran de ferirme as vacas e hai dous anos que teño que soportar esta situación".
O palense sinala que nos seus 56 anos nunca viviu unha situación similar e recalca que as perdas son cuantiosas. "Tiven que sacrificar xa unha vaca e hai outras malferidas. O peor é que as morden e logo eu teño que tomar a dura decisión de poñerlles a eutanasia porque non se pode facer nada por elas", di.
O home indica que hai tempo que os cans, dos que se descoñece a procedencia, roldan a zona: "Eu cheguei a ver cinco grandes con outros tantos cachorros". Recalca que non se trata de lobos, senón que "son cans de gran tamaño e moi violentos".
O afectado indica que en varias ocasións tivo que reforzar o peche da leira onde atacan ao gando. "Había tempo que me entraban, pero nas últimas semanas cebáronse co gando", recalca.
O home sinala que puxo a pertinente denuncia ante a Garda Civil e solicitou medidas ante as administracións "sen ter resposta".
PROCURA. O alcalde de Palas, Pablo Taboada, asegura que o Concello fai todo o posible para dar cos cánidos. "Fomos recollendo aos animais a medida que os veciños nos avisaban e puxémolos a disposición dos veterinarios. Algúns tiñan dono e outros non, pero nós non paramos de traballar", di e afirma que non cesan na procura da manada. "Desde Protección Civil tentan dar con eles, pero é difícil", sostén, e lamenta os danos que están a causar. Por iso insta os veciños a estabular as reses á noitiña "mentres non se arranxa o problema".
