Conde reclama axilidade no trámite de fondos Next Generation para Altri

O vicepresidente económico e conselleiro de Economía, Francisco Conde, demandou ao Goberno central unha maior cogobernanza coas comunidades autónomas na tramitación dos fondos Next Generation, que considera marcada "polo centralismo e a lentitude". Conde expresou a súa confianza en que poida acceder a estas axudas europeas un dos grandes proxectos presentados esta semana: a construción dunha biofábrica de fibras téxtiles en Palas de Rei da man da multinacional Altri. A creación deste complexo implicará un investimento de 800 millóns de euros e a creación de 2.500 empregos.

Francisco Conde reclamou ao Executivo central que permita a participación tanto do tecido económico como das comunidades autónomas na xestión dos fondos europeos Next Generation para poder axustar estes apoios á realidade de cada sector e de cada territorio. Incidiu tamén en que desde Galicia se cumpre tanto coa presentación de proxectos tractores como coa priorización de iniciativas solicitadas polo Goberno central.

O titular de Economía fixo estas manifestacións durante a súa participación na Comisión Xeral das Comunidades Autónomas, celebrada no Senado, co obxectivo de abordar a situación actual destes fondos.

Dos nove Pertes aprobados no Consello de Ministros por máis de 33.700 millóns de euros, menos do 14% traducíronse en convocatorias. "Os fondos teñen que servir para transformar a economía cara á innovación, a sustentabilidade e a dixitalización", afirmou Conde.

Galicia trasladou ao Executivo propostas a todas as convocatorias anunciadas por valor de 8.500 millóns de euros e coa participación de 200 empresas. Neste sentido, Conde mostrou a preocupación tanto do Goberno galego, como do sector da automoción da comunidade polo Perte do vehículo eléctrico e conectado, ante a posibilidade de quedar fóra a pesar de contar co principal fabricante de vehículos de España. Desde Stellantis Vigo indican que os requisitos esixidos non van permitir que poida acollerse ás axudas e advirten de que a situación pode ser prexudicial para a viabilidade da propia factoría e para a competitividade desta industria en Galicia.