O Concello de Monterroso está a realizar varias melloras no seu centro urbano. A semana pasada acabaron as obras de peonalización da Rúa G, onde se sitúa a igrexa parroquial, e antes de que acabe o ano farano as da Rúa San Antonio, unha zona de especial afluencia hostaleira. Para estas dúas intervencións, a administración local dedica 56.000 euros de fondos propios, dos remanentes das contas municipais. "Na Rúa San Antonio conflúen moitas terrazas, e a situación do tráfico era un perigo", valorou a rexedora, Rocío Seijas.
Con 35.000 euros de fondos propios situáronse macetas e bancos na Praza Rojo Losada, nas inmediacións do centro de saúde e nas principais rúas. Tamén se colocarán nas que se están peonalizando.
Doutra banda, para mellorar a seguridade viaria, o Concello repintó marcas viarias e de pasos de peóns nas principais rúas, con 20.000 euros. Esta mesma actuación levou a cabo no polígono industrial cunha subvención da Xunta de 28.000 euros.
As luminarias da Cúpula e da Praza Rojo Losada cambiaranse por led a finais de ano con 28.000 euros de fondos do plan único.
deporte. No ámbito da mellora de infraestruturas deportivas, Monterroso disporá a finais de ano coa terceira pista de pádel cuberta, o que lle permitirá participar en campionatos a nivel estatal. O investimento nesta obra é de 80.000 euros, dos cales a metade os achega a Xunta e a outra metade o Concello.
Ademais, tamén cunha subvención autonómica de 33.000 euros e 14.000 de fondos propios, están a arranxarse os vestiarios do campo de fútbol de Cerdeiriños e acometendo unha fase da rexeneración do céspede.
