O comercio de Melide volveu demostrar o seu potencial durante a campaña de Nadal, pois os case cen establecementos que forman parte do Centro Comercial Aberto pecharon a etapa con case 70.000 vendas. Esta cifra correspóndese coa cantidade das rifas repartidas entre as persoas que realizaron unha compra nalgún dos comercios adscritos para participar na vixésima edición da campaña Este Nadal toca en Melide. A través desta iniciativa todos os clientes participaron nun sorteo de 6.200 euros en vales, que se celebrou este venres.
A xerente da Asociación de Empresarios Terras de Melide, Pilar López, destacou que a tempada do Nadal foi "moi positiva" para a maioría de asociados "pois chegáronse a vender preto de 4.000 rifas máis que na pasada edición", dixo. Recalcou, no entanto, que para algúns establecementos a campaña empezou "algo frouxa" pero que nos últimos días lograron remontar as cifras "e incluso se superaron as expectativas", engadiu.
López indicou que desde hai anos "ou comercio melidao converteuse nun referente para vos clientes que ano tras ano deciden escoller a nosa vila para realizar as súas compras de Nadal".
A casa da cultura de Melide acolleu unha gala na que se sortearon ante notario entre os clientes que compraron na vila 6.200 euros en vales
De feito, precisou que durante esas datas achegáronse á localidade compradores de municipios limítrofes, pero tamén doutras provincias. A xerente explicou ademais que nesta iniciativa non só participaron comercios locais, senón tamén establecementos de hostalería "que nos últimos tempos decidiron unirse a esta campaña".
GALA. A casa da cultura de Melide acolleu o venres unha gala na que se sortearon ante notario entre os clientes que compraron na vila 6.200 euros en vales de compra. Esta cantidade está repartida nun premio de 2.000 euros, dous de 1.000, catro de 500 e un de 200 euros. O actor e guionista galego Manuel Manquiña foi o encargado de dirixir o acto que contou ademais coa presenza de membros do equipo directivo de Asetem e a alcaldesa de Melide, Dalia García.
