"Os cans tiraron a miña tía ao chan e arrastrárona do pelo uns 3 metros"

"Os dous cans abalanzáronse por detrás sobre a miña tía, tirárona ao chan e arrastrárona do pelo uns tres metros". Así relata Manuel Neira o calvario que viviu a súa tía Mercedes Crespo, de 89 anos de idade, o pasado domingo cando foi atacada en Melide por dous cans de raza perigosa.

Era mediodía e a muller dirixíase cara á súa vivenda. "Ela sempre ía por esa zona para atallar. Pese a ser unha persoa de avanzada idade é moi autónoma. Ese día dirixíase a casa para comer cando se atopou coa desgracia. Nin tempo tivo de defenderse", comenta o home. Ao parecer, a octoxenaria xa se cruzara nalgunha ocasión cos dous animais. "A ela non lle gustaban moito os cans, sempre lles tivo bastante respecto, pero o certo é que xa os vira antes e nunca lle fixeron mal", engade.

Soltárona grazas aos ciclistas, senón non sei se o contaría. Agora vai mellor pero téñena que operar máis veces

Os dous cans atacaron á anciá por detrás e de improvisto. "Nin tempo tivo a defenderse, foi brutal, ata lle arrincaron mechóns de pelo" "Asustouse tanto que nin se queixou e estivo consciente en todo momento", di Neira, quen se mostra moi agradecido aos ciclistas que acudiron para auxiliar á vítima. "Este tipo de cans cando morden non soltan. A muller que os levaba non era capaz de contelos e ata os ciclistas lles meteron a roda da bicicleta na boca e custoulles sacalos de enriba da miña tía. Soltárona grazas a eles, senón non sei se hoxe o contaría".

A octoxenaria recupérase agora das feridas o hospital de Santiago e terá que ser operada máis veces. A pesar de todo, o seu sobriño di que ela sempre ten "un sorriso na boca" e os seus veciños móstranlle o seu agarimo á espera de que volva a casa. "Non damos atendido o teléfono, é unha muller moi querida", resalta.