Boston e a súa contorna son un dos epicentros culturais, educativos, deportivos e científicos máis importantes dos Estados Unidos, e practicamente de todo o mundo. Alí naceron Edgar Allan Poe ou Dennis Lehane e triunfaron adoptivos como Larry Bird e Tom Brady. Alí estudaron Buzz Aldrin, Obama ou JFK. E precisamente alí, na Atenas de América, celebrouse recentemente o campionato mundial do café no que Javier Amboage e José Sanguiao deixaron o pavillón de Melide nun lugar excepcional.
O Coffee Spirit melidense é un centro de formación punteiro en España, unha afirmación que avalan resultados como o Campionato de España de Brewers Cup SCA que Amboage conquistou en Toledo hai unhas semanas, e que serviu como billete para competir no Mundial.
"Quedamos pola metade da clasificación. A experiencia foi moi boa", explica Sanguiao, responsable de Coffee Spirit e preparador de Amboage, que xa tivera unha experiencia mundialista en 2017, cando acudiu a Seúl para participar no torneo de Aeropress.
O mundo do café chegoulle a Javier Amboage totalmente por casualidade. "A min o café nunca me gustou. Pero nada. Eu son amigo de José e collíalle té, e el sempre me intentaba vender as propiedades do café. Sempre lle dicía que non ata que un día estaban alí facéndoo, probeino e descubrín un mundo que non imaxinaba", conta o representante español na World Brewers Cup.
Tras aquel día, unha cousa levou á outra. "Un día fun ao galego de Aeropress case por ir, como un afeccionado. A miña sorpresa foi que gañei e clasifiquei para o Nacional. E cal foi a miña sorpresa que volvín a gañar e puiden ir a Seúl", narra Amboage.
A súa última aventura cafetera levou a ambos a Boston, onde se atoparon con pequeno escollo. "Despois do Nacional tiven 15 días para o Mundial. O torneo ten unha parte de facer a receita e o café e unha parte expositiva á que non lle prestei atención e penalizoume moito. Era moi complicado, a campioa, unha rapaza chinesa, contoume que ela estivera preparando a súa rutina durante tres anos", conta.
Javier recupérase agora do último mes, no que competiu de ti a ti con auténticos profesionais. Quizais ao volver á normalidade teña tempo para un café.
"Messi e Ronaldo"
Amboage mostrou a súa satisfacción a pesar de crer que pode quedar máis arriba. "Eu son un afeccionado, alí había xente que escribiu os libros que eu teño. Foi como xogar un partido con Ronaldo e Messi", indica.
