LUGO. Unha vintena de persoas que participan nun taller dual de emprego de xardinería impulsado polos concellos de Melide e Boimorto realizarán melloras na contorna do Camiño de Santiago durante nove meses.
A actuación en Melide consistirá en adecuar o espazo que se atopa fronte aos centros socioculturais de Furelos e San Martiño, mentres que en Boimorto os traballos realizaranse na zona axardinada de contorna do Punto de Atención á Infancia, a residencia de persoas maiores, o centro de día, o centro médico e o centro social municipal.
Estes 20 desempregados contan cun contrato de formación e aprendizaxe, e os traballos na ruta xacobea forman parte do itinerario do propio taller de emprego, que combina accións formativas con labores prácticos.
Dez deles, ademais, terán a oportunidade de contar cun contrato en prácticas de polo menos tres meses máis nunha empresa da zona, e cunha actividade vinculada ás materias que estudan no taller.
O conselleiro de Economía, Emprego e Industria, Francisco Conde, realizou onte unha visita ao alumnado, na que estivo acompañado pola alcaldesa de Melide, Dalia García, e a rexedora de Boimorto, María Jesús Novo.
Conde indicou que o Camiño de Santiago é unha actividade fundamental para as comarcas de Melide e Arzúa, e recordou que a Xunta aposta pola conservación e posta en valor das rutas de peregrinación que atravesan ambos os municipios.
O conselleiro fixo fincapé en que, para impulsar a formación e o acceso ao mercado laboral, é indispensable a colaboración cos concellos.