Baleares non esixirá a partir do domingo ningún test de covid-19 aos turistas españois vacinados que entren no arquipélago a través dos seus portos e aeroportos, nin aos procedentes de comunidades autónomas cunha incidencia inferior a 60 casos por cada 100.000 habitantes en 14 días. Actualmente só están por baixo dese limiar Comunitat Valenciana e a cidade autónoma de Ceuta, ademais da propia Baleares.
A presidenta autonómica, Francina Armengol, explicou este mércores en Fitur que os viaxeiros deberán ter recibido, polo menos, a primeira dose da vacina 15 días antes da súa chegada ás illas para poder entrar sen necesidade de presentar algunha proba.
O conseller de Turismo, Iago Negueruela, apuntou que Baleares, cunha incidencia inferior a 50 casos por cada 100.000 habitantes, está "preparada" para recibir o maior número de turistas "posibles", tanto nacionais como internacionais.
Así as cousas, anúnciase este "cambio de formulación" nos controis de portos e aeroportos, nos que ata agora debía presentar unha PCR negativa calquera persoa que quixese entrar en Baleares. A partir do domingo, terán que amosar unha PCR ou un test de antíxenos —que empeza a ser válido— quen non estea vacinado ou proceda dunha comunidade cunha incidencia que supere os 60 casos.
Con estes cambios, Armengol asegura que Baleares quere realizar unha invitación "especial" aos españois para que visiten Mallorca, Menorca, Eivissa e Formentera na nova tempada turística co obxectivo de reactivar a economía das illas e ante a incerteza do turismo internacional. Augura, de feito, que este ano a presenza de turistas españois será "relevante" para as illas, cuxos dous principais mercados son Alemaña e o Reino Unido.
Baleares está actualmente no "semáforo verde" de Alemaña como un lugar seguro, mentres que o Reino Unido recomenda non viaxar a España de vacacións.