A caída dun raio na tarde deste domingo sobre a Casa Consistorial do Concello da Estrada (Pontevedra) causou importantes danos estruturais no edificio, informou a central que se ocupa de coordinar a atención ás urxencias en Galicia.
En concreto, quedou destruído o reloxo e tamén se rexistraron danos na cúpula do inmoble. Ademais víronse afectadas varias instalacións eléctricas e de telecomunicación.
Un particular deu a voz de alarma ás 20:00 horas do domingo. Segundo explicou, vía saír fume polo reloxo situado na fachada.
Outra persoa contactou minutos despois co 112 Galicia para indicar que na contorna da Casa do Concello explotaran varios farois a consecuencia da tormenta.
O persoal do 112 Galicia informou da situación aos Bombeiros do Deza, á Policía Local e á empresa eléctrica.
A caída dun raio provoca numerosos danos no consistorio da Estrada
O reloxo do inmoble quedou totalmente destruído e a súa cúpula tamén se viu afectada. Ademais a tormenta fixo explotar varios farois e algunhas instalacións eléctricas e de telecomunicación sufriron problemas
