O acusado de abusar dunha muller con deficiencia mental na localidade coruñesa de Cee asegurou este martes que non recorda tal situación porque estaba entón en estado de embriaguez.
A sección segunda da Audiencia Provincial da Coruña acolleu un xuízo por uns feitos ocorridos o 21 de xullo de 2012 polos que a Fiscalía pide seis anos e nove meses de prisión para o acusado, ao que lle solicita o pago de 6.000 euros á vítima por danos morais.
Segundo dixo o fiscal, o acusado estaba nunha zona de arbustos coa vítima, que sofre unha deficiencia mental, e para satisfacer o seu ánimo libidinoso comezou cunha serie de tocamentos e logrou unha felación.
Acúsao dun delito de abusos sexuais e outro de exhibicionismo e provocación sexual porque na zona había varias persoas, entre elas uns nenos, que viron os supostos feitos.
A defensa negou a responsabilidade penal do procesado porque considera que o consumo de alcol daquel día foi tal que o converte en eximente.
O propio acusado dixo que non recorda o ocorrido porque "estaba bebido", aínda que comentou que a vítima e el eran amigos e tamén parella".
Varias testemuñas afirmaron que o acusado "adoita estar bebido" e que "é público que ela ten unha deficiencia", aínda que denunciaron o ocorrido ante a Policía porque "había nenos diante".
Viron, segundo dixeron, os tocamentos e a felación, que primeiro se produciron na rúa e despois nunha discreta zona de arbustos.
A axente da Policía Local que os sorprendeu asegurou que el exclamou entón: "Fodéstesme o plan, estaba a pasalo ben, estaba na gloria".
Pola súa banda, un forense detallou que a vítima "é facilmente influenciable, manexable" debido aos seus problemas mentais e, de feito, hai unha sentenza de 2007 que a incapacita, polo que non compareceu.
