Un home resultou ferido este luns pola mañá en Trasmiras ao declararse un incendio no vehículo no que circulaba. O condutor sofre varias queimaduras. Foi trasladado en helicóptero ao hospital Povisa de Vigo. En concreto, os feitos tiveron lugar na N-525, a estrada que une Xinzo con Verín, á altura da capela da localidade, segundo informa o 112.
Un particular deu a voz de alarma ao 112 Galicia ás 11:20 horas desta mañá. O persoal do CAE 112 Galicia informou aos Bombeiros de Xinzo e a Urxencias Médicas. A situación tamén foi posta en coñecemento de Protección Civil e da Garda Civil de Tráfico.
Os efectivos sanitarios decidiron mobilizar ata o lugar dos feitos o helicóptero medicalizado con base en Ourense e unha ambulancia. O condutor recibiu asistencia sanitaria no punto antes de ser trasladado. Os Bombeiros, mentres, procederon á extinción do lume, aínda que o turismo acabou ardendo por completo. Á espera de coñecer os detalles dos feitos, os Bombeiros indicáronlle ao 112 Galicia que todo apunta a que o vehículo ardeu por mor dunha avaría.
UN CERVO. Sen saír da provincia de Ourense, unha colisión en cadea de tres automóbiles, despois de que o condutor do primeiro deles atropelase un cervo e quedase parado na calzada, deixou catro feridos na Veiga.
En concreto, o accidente tivo lugar na OU-0804, a vía que conecta Alto do Covelo (Ourense) e Veiga. Ningún dos feridos sofre feridas de gravidade.
Sofre queimaduras ao incendiarse o coche no que viaxaba en Trasmiras
Tamén na provincia de Ourense, catro persoas resultaron feridas nun accidente provocado por un cervo na Veiga
