O cuarto día de procura do neno de vinte meses que o luns foi arrastrado polo mar na praia asturiana de Frejulfe, en Navia, finalizou sen éxito, nunha xornada na que os mergulladores da Garda Civil seguiron sen poder participar no dispositivo polas condicións do mar. Os medios aéreos, integrados polos helicópteros de Salvamento Marítimo, o Servizo de Urxencias do Principado (Sepa) e a Garda Civil, traballaron durante toda a xornada ata a noitiña nunha ampla zona da costa occidental asturiana, do mesmo xeito que a embarcación Salvamar Capella.
Pola súa banda, o operativo por terra, no que participan máis de trinta persoas, continuou peiteando unha ampla franxa do litoral, entre a ría de Navia e Cudillero, e incluso dúas patrullas da Garda Civil desprazáronse para buscar, tamén sen éxito, na praia dos Quebrantos, en San Juan de la Arena, seguindo a dirección das correntes mariñas. Fontes da Garda Civil informaron a Efe de que os integrantes do Grupo Especial de Actividades Subacuáticas (GEAS) "téñeno todo preparado" para incorporarse ao operativo en canto sexa posible e que este venres volverán intentalo.
O temporal deu este xoves un pequeno respiro, despois de varios días de avisos por forte ondada e vento, aínda que a Axencia Estatal de Meteoroloxía anunciou unha nova alerta a partir da medianoite que podería volver complicar a situación. A desaparición do neno, que chegara cos seus pais de Perú a Asturias había poucas semanas para coñecer aos seus avós e iniciar unha nova vida en España, produciuse sobre as 17:20 horas do luns.
O suceso ocorreu na praia de Frejulfe, a poucos quilómetros da residencia familiar, onde o pequeno acudira co seu pai e o seu avó contemplar o temporal, do mesmo xeito que outros veciños da zona, xusto cando a marea estaba máis alta e había alerta laranxa por ondas de ata oito metros. Un golpe de mar sorprendeunos cando trataban de pasar por unha zona na que a praia se estreita por mor dun entrante de rocas, a pesar das advertencias dalgúns veciños que tamén se atopaban na praia contemplando o mar.
A onda tirou ao chan ao pai e ao avó, que levaba en brazos ao pequeno, e arrastrounos mar dentro, momento no que perderon ao neno. Os dous adultos lograron saír do mar "de milagre", segundo relatou o concelleiro de Seguridade, Marino Fernández, un dos presentes neses momentos na praia, que avisou de inmediato aos servizos de urxencia, que chegaron en poucos minutos ao areal para iniciar a procura.
Segue sen éxito a procura do neno arrastrado polo mar en Navia
Os servizos de urxencias non dan co corpo do menor catro días despois de que fora tragado polo mar
