Os traballos para rescatar ao pequeno Julen proseguen este xoves cando se cumpren 90 horas desde que caeu ao pozo mentres pasaba un domingo de campo con familiares e amigos na localidade malagueña de Totalán. Así o indicaron a Efe fontes do dispositivo de rescate, que está integrado por un centenar de persoas, no que colaboran empresas privadas, e ao que se sumou tamén a Brigada de Salvamento Mineiro de Hunosa.
A última novidade é que os técnicos que integran o dispositivo de rescate do pequeno decidiron practicar dous túneles verticais, un a cada lado, do estreito pozo.
Así o anunciou este xoves aos xornalistas o representante do Colexio de Enxeñeiros e Camiños de Málaga, Ángel García, quen explicou tamén que xa se conseguiu rebaixar en 15 metros o nivel do cerro, a metade do que se prevé facer.
Os dous túneles verticais estarían ao carón e outro do pozo onde caeu Julen, que se cre que está a uns 71 metros de profundidade.
Ademais, o operativo segue centrado desde este mércores pola tarde na construción dunha plataforma que permita perforar ademais dos dous túneles paralelos, outro oblicuo e tratar así de chegar a uns 80 metros de profundidade, onde se cre que se atopa o pequeno. Este é un dos traballos que levan a cabo na zona, que tamén inclúe entubar o orificio co obxectivo de afianzalo ante a escavación das dúas galerías alternativas polas que se espera levar a cabo o rescate.
Ao redor dun centenar de persoas, tanto nenos como mozos e maiores, camiñaron o mércores desde a localidade até as proximidades do lugar onde desenvolven as tarefas de rescate con pancartas como "Todos somos Julen", para apoiar á familia e aos integrantes do dispositivo de procura.