Rescatado o ocupante dun turismo que caeu ao mar pola noite en Sada

A marea baixa facilitou a manobra que permitiu saír do coche o home, que non sufriu feridas de importancia 
Un momento del rescate del hombre en Sada. TVG
photo_camera Un momento do rescate do home en Sada. TVG

Un home foi rescatado na noite do xoves tras caer o turismo no que se atopaba ao mar no porto de Sada. Atendendo á información do 112 Galicia, no momento do accidente a marea estaba baixa, "o que facilitou o rescate do condutor", que resultou practicamente ileso.

Os feitos ocorreron no porto da localidade uns minutos antes das 22.00 horas. Varios particulares contactaron co 112 para avisar da caída e o persoal do servizo de urxencias requiriu a intervención dos Bombeiros de Betanzos, do Servizo Municipal de Protección Civil de Sada, de Urxencias Sanitarias de Galicia-061, da Policía Local e da Garda Civil de Tráfico. 

O 061 desprazou unha ambulancia asistencial e un equipo sanitario para asistir o ocupante do turismo, de iniciais C.M.G.F., que recibiu o alta no lugar tras ser atendido. Segundo a información da TVG, o home, duns 50 anos, presentaba síntomas de embriaguez.