O home acusado de coaccionar e queimar a casa da súa ex en Dumbría pide non pasar máis de catro anos en prisión

O home que recoñeceu ter coaccionado a súa exparella e queimar a entrada da súa casa no municipio coruñés de Dumbría pediu este xoves non pasar máis de catro anos en prisión, aínda que o fiscal solicita que sexan quince e a acusación particular sobe ata dezasete.

A Audiencia Provincial da Coruña acolleu entre este mércores e este xoves o proceso contra un home de 33 anos natural de Cee, que se declarou autor dun delito de coaccións graves co agravante de disfrace e dun delito de incendio.

No seu informe, o fiscal eliminou os case 6.000 euros de responsabilidade civil, xa abonados, e mantivo a súa petición de tres anos polas coaccións e outros doce polo incendio.

A acusación particular engade 8.000 euros por danos morais, aumenta en dous anos a pena de prisión polo incendio e sobe desde sete ata dez os anos de afastamento.

Os feitos ocorreron entre outubro e decembro de 2014 en Dumbría, na contorna da localidade de Olveiroa, onde residía a vítima.

A súa defensa solicita, en cambio, que as coaccións sexan consideradas no seu grao máis leve, que o mandarían a prisión entre seis e doce meses, polo que cumpriría a pena, xa que leva desde hai un ano en prisión provisional.

Polo delito de incendio espera que o condenen a entre un e tres anos porque di que non existiu risco para a vida das persoas que residían na casa e que se tratou dun lume de pequenas dimensións.

As dúas penas comportarían un máximo de catro anos de cárcere, aínda que terá que ser o tribunal o que decida na sentenza tras o recoñecemento dos feitos por parte do acusado.

Este mércores, na súa declaración, este confesou que abordou a que foi a súa parella entre agosto e outubro de 2014 o 6 de decembro para amedrentala mentres ela conducía.

El ía noutro coche con dúas persoas, que non están sentadas no banco, e conseguiu que ela se detivese, tras o que, encapuchados, foron cara a ela cunha pistola de xoguete para infundirlle temor.

Recoñeceu tamén que a noite do 15 de decembro achegouse á casa da vítima e arroxou unha botella de plástico na entrada que asperxera cun litro e medio de gasolina e prendeulle lume, co que causou danos á zona de acceso da casa.

A vítima recordou o suceso do coche, que pensa que estivo a piques de acabar con ela fóra da estrada, e engadiu que aínda sofre secuelas polo incendio.

"Se se me pega un coche por detrás, teño medo. Todos os días que vou para durmir teño que mirar todas as fiestras. Non volvín a durmir unha noite enteira", concluíu.