O condutor dun turismo entrou en parada cardiorrespiratoria cando circulaba pola parroquia ceense de Brens e faleceu, informou o 112. Os facultativos de Urxencias Médicas trataron de reanimalo en repetidas ocasións, pero nada se puido facer por salvarlle a vida.
Ocorreu pouco despois das once deste domingo, xusto diante da Igrexa Parroquial de Brens. Un vehículo saíuse da vía e os veciños alertaron aos servizos de urxencias. Cando chegaron, atoparon ao condutor inconsciente e en parada cardiorrespiratoria.
O coche quedou fóra da vía e apenas estorbando á circulación. Desde un inicio, concluíron que, posiblemente, o home sentiuse indisposto e iso provocou que perdese o control do vehículo.
Tras recibir o aviso, o persoal do CAE 112 Galicia pediu a colaboración dos Bombeiros de Cee, voluntarios de Protección Civil e axentes da Policía Local.
