O ancián de 84 anos atropelado o pasado 31 de marzo en Villablino (León) por un garda civil que se deu á fuga, aínda que puido ser detido días despois, faleceu este martes no Hospital do Bierzo de Ponferrada onde permanecía ingresado desde o accidente.
O suposto autor do atropelo, un garda civil en activo, foi detido o 6 de abril tras unha laboriosa investigación que permitiu localizar o vehículo implicado, xa que unha testemuña do suceso puido precisar a marca do turismo. Con esa pista os investigadores lograron chegar ata o suposto autor do atropelo, que presta servizo como garda civil na comandancia de León, cidade na que foi detido.
O suceso tivo lugar ás 22.00 horas do sábado 31 de marzo na avenida de Asturias de Villablino, fronte ao hostal Marga, no que se aloxaba a vítima. O vehículo involucrado deuse á fuga logo de alcanzar ao peón e arrastralo varios metros pola calzada.
Ao detido, de 47 anos, acúsaselle dos delitos de lesións, omisión do deber de socorro e contra a seguridade viaria.
