O subsector de Tráfico da Garda Civil de Lugo investiga a un veciño de Cospeito, de 42 anos, como suposto autor dun delito de estafa á súa compañía de seguros, por afirmar que atropelara a un raposo co seu vehículo, cando en realidade o accidente no que se viu implicado só foi unha saída de vía.
O accidente produciuse na estrada provincial LU-P-4401, o pasado 3 de marzo e á altura do municipio da Pastoriza. No sinistro só se produciron danos materiais e o condutor, que resultou ileso, dixo "atropelar a un raposo", pero os axentes de Tráfico sospeitaron desde o primeiro momento de que se tratou "unicamente dunha saída de vía".
Tras realizar varias pescudas, o condutor acabou prestando declaración este martes como investigado pola súa participación nun delito de estafa ao seguro. As dilixencias xa están en mans do Xulgado de Garda de Lugo.
Investigado un veciño de Cospeito por intentar estafar ao seguro cun falso atropelo dun raposo
O accidente produciuse na Pastoriza e o condutor dixo que foi por culpa do animal, pero segundo Tráfico tratouse "unicamente" dunha saída de vía
