Unha muller de 70 anos faleceu na residencia onde vivía despois de que se lle incendiase o pelo, que peiteara con laca, posiblemente pola faísca do chisqueiro ou do cigarro que acendera.
O suceso tivo lugar este mércores a media mañá cando a muller, "completamente válida" saíu ao exterior da residencia do Grupo Vitalia, na localidade zaragozana de Cadrete, para tomar o sol e o aire e fumar.
"Vímola ardendo e sorprendeunos a voracidade das chamas e a combustión tan rápida", describiu o director de operacións do Grupo Vitalia, Antonio Morais, quen contou que rapidamente intentaron sufocar o lume que alcanzaba a cabeza e o tronco da residente.
Lograron apagar as chamas, pero as feridas da muller "eran considerables" e tras avisar aos servizos de urxencia unha ambulancia trasladouna ao Hospital Miguel Servet de Zaragoza, onde faleceu sobre as 16.00 horas, informou Antonio Morais.
Ata o lugar tamén se desprazaron axentes da Garda Civil que abriron unha investigación para escalecer os feitos e cos que o Grupo Vitalia mostrou a súa total disposición a colaborar, aseguraron a Europa Press.