Unha colisión na que se viron implicados dous vehículos que circulaban este venres á altura do quilómetro 50 da N-547 en dirección a Santiago, moi preto da entrada ao centro urbano de Melide, saldouse cos condutores e únicos ocupantes de ambos os automóbiles feridos de diversa consideración, aínda que un deles tivo que ser evacuado en helicóptero dada a gravidade das súas lesións.
O sinistro tivo lugar cando pasaban uns minutos das once da mañá. O condutor do primeiro vehículo, A.G.V., de 61 anos e veciño de Melide, realizaba nese momento un xiro á esquerda coa intención de acceder ás instalacións dun concesionario que hai na zona, cando foi alcanzado lateralmente polo outro turismo implicado, que nese instante estaba a efectuar un adiantamento.
O condutor deste segundo vehículo, un súbdito de nacionalidade romanesa de 28 anos de idade, atopouse co outro automóbil situado xa nunha posición practicamente perpendicular á estrada e non puido evitar alcanzalo lateralmente.
Un particular foi o que alertou ao 112 Galicia, que mobilizou a unha patrulla de Tráfico, Protección Civil de Melide, urxencias médicas e aos bombeiros de Arzúa, aínda que estes últimos non chegaron a actuar.
Unha vez no lugar do sinistro e ante a gravidade das feridas que presentaba A.G.V., os servizos sanitarios decidiron o seu traslado en helicóptero a un centro hospitalario de Santiago. O condutor do outro automóbil implicado no sinistro foi atendido na PAC de Melide e, en principio, as súas lesións parecían non revestir gravidade.
Evacuado en helicóptero o condutor dun turismo accidentado en Melide
Estaba a realizar un xiro á esquerda cando foi alcanzado lateralmente por outro vehículo
