A Policía Nacional detivo na Coruña un home de 33 anos con arrestos previos que roubaba a mulleres maiores as xoias que portaban polo método do tirón. Segundo informou o corpo, os feitos producíronse entre marzo e maio do presente ano, cando tería cometido 15 roubos.
En todos eles utilizaba o mesmo modus operandi: achegábase por detrás ás vítimas e tiraba das xoias que levaban. O home centrábase habitualmente en colares e cadeas, aínda que en dúas ocasións arrebatou ás mulleres os pendentes. Nun destes casos causou lesións á vítima ao arrincárllelos das orellas.
Durante a investigación policial destes feitos logrouse identificar o autor e procedeuse á súa detención o 16 de xuño. Unha vez tramitadas as dilixencias, o arrestado foi posto a disposición da autoridade xudicial, que decretou o seu ingreso en prisión.