Unha moza de 29 anos foi detida esta madrugada en Lugones, Asturias, por matar supostamente con arma branca á súa parella, un home de 56 anos co que mantivera previamente unha discusión motivada polos celos. "Estaba na cama e, cando me levantei, estaba feito", sinalou a nai da presunta homicida a varios medios de comunicación. Ademais, recoñeceu que, tras o crime, a filla entrou na súa habitación e contoulles que o apuñalara.
O suceso tivo lugar cara ás 2.30 horas deste martes no piso dos pais da moza, situado no número 6 da rúa Río Sella, en Lugones, no municipio asturiano de Siero. Tras ser alertados os servizos de urxencia, ata o lugar do crime desprazouse de madrugada persoal sanitario do 112 Asturias e axentes da Policía Nacional que, tras inspeccionar a vivenda procederon á detención da moza, Ana María H.C., de 29 anos.
A moza, que foi conducida a dependencias xudiciais á espera de que, probablemente este mércores, pase a disposición xudicial, tiña antecedentes policiais por queimar colectores. Ao longo da mañá, axentes da Policía Científica desprazáronse á vivenda e as súas inmediacións en busca de probas e da arma do crime.
O cadáver do home, Miguel A.S., foi trasladado pola mañá ao Instituto de Medicina Legal de Asturias, onde lle será practicada a autopsia.
