O home que se atrincheirou cunha escopeta na vivenda da súa exparella en Cangas do Morrazo durante tres horas faleceu de madrugada no hospital ao que foi trasladado tras dispararse nun ombreiro. M.V. tiña 52 anos e era moi coñecido na localidade. Desde hai días pesaba sobre el unha orde de afastamento da súa ex, coa que protagonizara incidentes ultimamente, chegando incluso a agredila cun cutter.
O home, que padecía problemas psiquiátricos, entrou ás 21.30 horas na vivenda, situada na Avenida de Lugo. Naquel momento realizou un disparo ao aire, aínda que non se rexistraron feridos.
Segundo informa a Garda Civil, a súa esposa saíu do inmoble asustada ao ver a arma e dirixiuse ás dependencias da Benemérita. Varias patrullas da Policía Local e da Garda Civil mantivéronse na zona durante varias horas.