Os servizos de rescate continúan este mércores por terceiro día consecutivo a procura do neno de vinte meses que o luns pola tarde foi arrastrado por unha onda cando se atopaba co seu pai e o seu avó na praia asturiana de Frejulfe, en Navia. Durante a noite seguiron coa procura por terra varios equipos de Bombeiros de Asturias e da Garda Civil, e ás 08:00 horas sumouse o resto do operativo terrestre, no que tamén participan Protección Civil, Policía Local e Cruz Vermella.
Tamén saíu xa cara á zona a embarcación de Salvamento Marítimo Salvamar Capella e estase coordinando o dispositivo aéreo, informaron a Efe fontes do organismo dependente do Ministerio de Fomento. Está previsto que durante o día se releven os helicópteros de Salvamento Marítimo, o Servizo de Urxencias do Principado de Asturias e a Garda Civil. A área de procura volverá centrarse entre a ría de Navia e Porto de Vega.
Durante este martes, o forte temporal dificultou os labores de procura e chegou a obrigar aos medios aéreos a retirarse durante unhas horas a media mañá. A Axencia Estatal de Meteoroloxía (Aemet) rebaixou para este mércores o nivel de alerta por fenómenos costeiros de laranxa a amarelo, cunha previsión de ondada de ata cinco metros.
A desaparición do neno, que chegara cos seus pais de Perú a Asturias había poucas semanas para coñecer aos seus avós e iniciar unha nova vida en España, produciuse sobre as 17:20 horas do luns. O tráxico suceso ocorreu na praia de Frejulfe, a poucos quilómetros da residencia familiar, onde o pequeno acudira co seu pai e o seu avó contemplar o temporal, do mesmo xeito que outros veciños da zona, xusto cando a marea estaba máis alta e había alerta laranxa por ondas de ata oito metros.
Un golpe de mar sorprendeunos cando trataban de pasar por unha zona na que a praia se estreita por mor dun entrante de rocas, a pesar das advertencias dalgúns veciños que tamén se atopaban na praia contemplando o mar. A onda tirou ao chan ao pai e ao avó, que levaba en brazos ao pequeno, e arrastrounos mar dentro, momento no que perderon ao neno.
Os dous adultos lograron saír do mar "de milagre", segundo relatou o concelleiro de Seguridade, Marino Fernández, un dos presentes neses momentos na praia, que avisou de inmediato aos servizos de urxencia, que chegaron en poucos minutos ao areal para iniciar a procura.
Continúa por terceiro día a procura do neno desaparecido en Navia
O menor foi arrastrado por unha onda cando se atopaba co seu pai e o seu avó nunha praia da localidade asturiana
