Un condutor que arroxou unha taxa de alcol catro veces superior á permitida pola lei ao ser interceptado pola Policía Local de Lugo, logo de circular polas rúas da cidade sen respectar os sinais de tráfico e facendo manobras arriscadas, aceptou hoxe unha pena de seis meses de cárcere e un ano de suspensión do carné de conducir.
Inicialmente o ministerio fiscal solicitaba para o imputado unha pena dun ano e tres meses de prisión, pero a acusación pública e a defensa chegaron a un acordo de conformidade antes do xuízo que ía celebrarse hoxe no Xulgado do Penal número 2 de Lugo.
Segundo o escrito de acusación, ao que Efe tivo acceso, o acusado conduciu por varias rúas da cidade de Lugo "a gran velocidade", "zigzagueando entre os vehículos" que se atopaba ao seu paso, "derrapando" incluso nalgún momento do seu periplo e sen respectar a sinalización existente, polo que puxo "en perigo" aos demais condutores e aos peóns.
Cando conseguiron interceptalo, os axentes que o perseguían advertiron que presentaba síntomas evidentes de atoparse baixo a influencia de bebidas alcohólicas e, ao ser sometido ao pertinente control de alcoholemia, arroxou unha taxa de 0,99, catro veces máis do permitido pola lei.
