O futbolista español do Bayern de Munich alemán Xabi Alonso emitiu un comunicado na súa páxina de Twitter no que afirma con "absoluta rotundidade" que "sempre" cumpriu coas súas obrigacións fiscais.
Respondía así este martes á información que publica o diario madrileño El Mundo, segundo a cal o xogador sería denunciado por un delito fiscal, Alonso asegura que actuará "en consecuencia" e en "defensa" dos seus intereses, coas medidas que estime "oportunas", e que demostrará que "todas" as súas obrigacións fiscais "foron cumpridas escrupulosamente".
Con todo, a Fiscalía de Madrid confirmou a Efe que abriu unhas dilixencias de investigación por mor dunha denuncia da Axencia Tributaria para determinar se o futbolista cometeu delito fiscal nunha serie de ingresos non declarados polos seus dereitos de imaxe durante a súa etapa como futbolista do Liverpool inglés.
Está a estudarse a información para determinar as actuacións que corresponde practicar, polo que a Fiscalía aínda non fixou posición respecto da transcendencia penal dos feitos de face a unha hipotética presentación de querela no caso de que se aprecie que Alonso incorreu nalgún delito.
A petición de investigación realizada pola Axencia Tributaria deixaba entrever un caso "moi similar" ao do xogador arxentino do FC Barcelona Javier Mascherano.
Javier Mascherano, co que coincidiu entre 2007 e 2009 no Liverpool, defraudaría 1,5 millóns de euros a través dunhas empresas das que é titular na declaración dos seus dereitos de imaxe.
