A cantante colombiana Shakira asegurou este martes en Xerusalén ante o presidente de Israel, Simón Peres, que quere un mundo "como o Barça" para "gañar o partido contra a discriminación". "Gustaríame un mundo que funcionase coma un equipo, tal e como o fai o Barça. Deste xeito poderemos gañar o partido contra a discriminación", dixo nunha rolda de prensa mentres o seu noivo, o futbolista culé Gerard Piqué observaba desde a primeira fila.
Shakira tivo outra mención ao clube español ao recordar que parte dos centenares de nenos xudeus e árabes que a recibiron nun colexio bilingüe de Xerusalén vestían camisetas do F.C. Barcelona. "Esta visita é unha oportunidade para resaltar a importancia de como criar aos nosos fillos (...) O bo coa educación é que non fan falta cincuenta ou cen anos para ver os resultados, senón que se poden ver todos os días de forma inmediata", sinalou.
O octoxenario Peres protagonizou a anécdota da xornada ao chamar "Sharika" á exitosa artista de Barranquilla, que lle corrixiu con educación. Peres argumentou enseguida que se confundiu porque pretendía establecer un paralelismo entre o nome da cantante e unha palabra grega.
Shakira participa na sesión inaugural dun foro de conferencias auspiciado por Peres titulado denominado "Enfrontando o mañá 2011", iniciativa que aborda entre outros asuntos estratexias para garantir a protección e educación na infancia. A fundación de Peres ten asinado senllos acordos de colaboración tanto coa Fundación F.C. Barcelona como coa fundación de Shakira, "Pés Descalzos", destinadas a promover a educación e formación dos nenos en valores como o deporte.
Pola mañá, Shakira foi recibida con grandes mostras de xúbilo por centenares de nenos que lle cantaron o "Waka-Waka" nun acto no patio do colexio organizado por UNICEF.
A cantante, que acudiu ao centro sen a compañía de Piqué, mesturouse entre os pequenos, moitos dos cales lucían camisetas azulgranas, e non dubidou en abrazar e saudar a todos os que puido á vez que sentou entre eles en primeira fila para poder ver a actuación.
Shakira pronunciou un conciso "shalom, marhaba" (ola, en hebreo e en árabe) e subliñou que quixo acudir ao colexio onde se imparte unha educación bilingüe e binacional pola importancia que ten para a convivencia entre os pobos.
A artista e o seu noivo atópanse desde o luns en Xerusalén, onde tiveron ocasión de visitar a cidadela antiga e o Muro das Lamentacións. No máximo santuario do xudaísmo tiveron que ser rodeados por un importante dispositivo de seguridade ante a atenta mirada de curiosos, veciños e turistas na cidade santa.
