A Axencia Española de Medicamentos e Produtos Sanitarios (AEMPS), dependente do Ministerio de Sanidade, Servizos Sociais e Igualdade, prohibiu a comercialización e ordenou a retirada do mercado de todas as unidades do complemento alimenticio Gouttes D'Amour, por conter o principio activo o sildenafilo, da familia do popular fármaco para a disfunción eréctil viagra.
O produto foi detectado a través da Consellería de Presidencia e Saúde Pública da Cidade Autónoma de Melilla, e a súa posta no mercado non fora comunicada ás autoridades competentes. Ademais, as análises levadas a cabo polo Laboratorio Oficial de Control da AEMPS detectaron o sildenafilo a pesar de non estar incluído nin declarado na súa etiquetaxe.
Este composto actúa restaurando a función eréctil deteriorada mediante inhibición selectiva da encima fosfodiesterasa 5 (PDE-5) e a súa presenza foi detectada en cantidades suficientes como para conferirlle a condición de medicamento.
Segundo alerta a AEMPS, este tipo de compostos están contraindicados en numerosos pacientes, como en quen sufriron infarto agudo de miocardio, anxina inestable, anxina de esforzo, insuficiencia cardíaca, arritmias incontroladas, hipotensión ou hipertensión arterial non controlada, ou trastornos hereditarios dexenerativos da retina, entre outros.
Así mesmo, tamén presenta numerosas interaccións con outros medicamentos, podendo ademais aparecer reaccións adversas de diversa gravidade a ter en consideración, como as cardiovasculares, xa que o seu consumo asociouse a infarto agudo de miocardio, anxina inestable, arritmia ventricular, palpitacións, taquicardias, accidente cerebro vascular, incluso morte súbita cardíaca.
O problema, segundo detallou esta axencia do Ministerio, é que se presenta como estimulante sexual "ocultando ao consumidor a súa verdadeira composición e dando información enganosa sobre a súa suposta orixe natural e a súa seguridade".
De feito, recoñece que os individuos especialmente susceptibles de padecer reaccións adversas co consumo de inhibidores da PDE-5 son quen poderían recorrer a produtos deste tipo, pretendidamente naturais, a base de plantas, "como alternativa teoricamente segura aos medicamentos de prescrición autorizados que estarían contraindicados". E esta adulteración "leva a expor ao suxeito que os consome a un risco significativo para a súa saúde", segundo alerta a AEMPS.
Sanidade prohibe un complemento alimenticio por incluír o principio activo da viagra
O produto Gouttes D'Amour contén sildenafilo sen estar incluído nin declarado na súa etiquetaxe
