A Axencia Española de Medicamentos e Produtos Sanitarios (Aemps) -dependente do Ministerio de Sanidad- ordenou a retirada definitiva do mercado de 66 produtos homeopáticos ao non achegar a documentación correspondente para a súa autorización. O Ministerio está a levar desde hai meses un proceso de autorización e rexistro dos produtos homeopáticos en España para o que estableceu un calendario con prazos para que os fabricantes presentasen a documentación necesaria para a súa avaliación, segundo recorda a Aemps nun comunicado.
Os 66 produtos retirados que teñen indicación terapéutica ou con vía de administración inxectable non presentaron a documentación requirida, polo que a Aemps procedeu a ordenar a súa retirada do mercado. Este organismo de Sanidade anunciou o pasado 30 de abril a publicación da orde ministerial que determinaba os requisitos mínimos e o procedemento para que os produtos homeopáticos se adecuaran ao rexistro como estaba previsto nunha directiva europea.
O pasado mes de outubro un total de 2.008 medicamentos homeopáticos pediron a Sanidade adecuarse á nova regulación, mentres que o resto de produtos que non cursaron a súa autorización deixaron de ser comercializados e foron retirados do mercado.
A Aemps subliña no comunicado que eses máis de dous mil medicamentos que estaban á venda non son produtos autorizados por este organismo senón que se permite a súa comercialización ata que se produza a avaliación. Deses 2.008, 66 son, polo momento, os produtos denegados co que terán que abandonar o mercado.
Entre eles atópanse algúns como Berberis-Moaccord -para procesos inflamatorios do tracto urinario- Dr.Reckeweg R10 -para os síntomas da menopausa-; Dr.Reckweg R11 Inject -para dores musculares-; Oscilogrip -para os estados gripais e arrefriados-; Pulsatilla Compositum -para estimular as defensas-; ou Cartilago Suis Injeel- para dores no cartílago-, entre outros.
O calendario establecido pola Aemps consta de seis ciclos: o primeiro comprende a solicitude dos expedientes con indicación terapéutica (serán avaliados como o resto dos medicamentos seguindo os mesmos principios científicos) e aqueles sen indicación terapéutica cuxa vía de administración sexa inxectable.
Os produtos do segundo ciclo en diante son aqueles que se notificaron como 'sen indicación terapéutica' (con excepción dos inxectables) e que poden acollerse ao procedemento de rexistro simplificado de acordo á normativa. Ao finalizar a avaliación será cando se determinen as condicións de prescrición deste tipo de produtos e será cando deban incluír na cartonaxe e prospecto as lendas que permitan a correcta identificación dos mesmos.
