O cantante Ricky Martin, embaixador de boa vontade de Unicef desde 2003, visitou os pasados dous días a nenos e adolescentes refuxiados no Líbano e pediu que se protexa o futuro de millóns de menores afectados pola guerra en Siria.
"Atopei nenos que se viron forzados a converterse nos que gañan o pan para as súas familias, traballando ata 12 horas ao día", dixo este venres a estrela ao concluír a súa visita, segundo un comunicado do Fondo das Nacións Unidas para a Infancia (Unicef).
Martin recordou que preto de 2,8 millóns de nenos non están escolarizados na rexión e pediu ao mundo que faga máis para "protexer os menores da explotación e para facilitarlles o acceso a contornas seguras nas que poidan ser educados e empoderados".
O cantante de Porto Rico dixo estar impactado pola historia de Batoul, unha moza de 11 anos da cidade siria de Homs (centro), a cal ten que traballar a cambio de auga e un teito, e xunto á súa nai e as súas dúas irmás son as que manteñen a familia de 13 membros.
"Estou inspirado pola coraxe destes nenos (...). Investir no seu presente é investir no futuro da rexión", asegurou Martin.
O portorriqueño participou nas actividades que Unicef desenvolve con nenos e adolescentes para ofrecerlles unha contorna segura nos campos de refuxiados; ademais reuniuse con adolescentes que están a ser formados para que adquiran as capacidades intelectuais e prácticas que necesitan.
Aproximadamente 1,1 millón de sirios buscaron refuxio no Líbano desde o inicio da guerra no seu país en 2011 e máis da metade deles son nenos que están expostos á explotación e abusos, e un gran número deles non pode ir á escola porque teñen que traballar, segundo a Onu.
Unicef traballa co Goberno libanés e outras organizacións humanitarias para cubrir as necesidades de sanidade, alimentación e educación duns 800.000 nenos vulnerables, así como adolescentes que necesitan apoio.
Ricky Martin visita a nenos e adolescentes refuxiados sirios no Líbano
O cantante, embaixador de Boa Vontade de Unicef desde 2003, viaxou ata un campo de desprazados preto de Trípoli