O expresidente do Goberno Mariano Rajoy mostrou o seu apoio ao programa de aprendizaxe de Code.org, do que recordou que pretende fomentar a linguaxe da programación nos nenos e que cualificou como toda unha "unha revolución" para mellorar o benestar social.
A través dun vídeo publicado pola propia plataforma, Code.org, Rajoy secundou este proxecto xurdido hai oito anos en Silicon Valley e utilizado por dous millóns de profesores en Estados Unidos, o cal busca, segundo destaca, que os nenos "estuden programación como no seu día desde pequenos estudan inglés".
O obxectivo de Code.org é popularizar o estudo da linguaxe informática e demostrar que calquera mozo pode aprender nocións básicas deste campo.
Unha visión compartida por Mariano Rajoy, quen di na súa mensaxe: "Aínda que ti non sexas programador, que comprendas e entendas a linguaxe da programación é fundamental para o emprendemento e profesións stem".
Este proxecto está apoiado por grandes personalidades como Bill Gates, Barack Obama, Mark Zuckerberg ou Jeff Bezos, incluso a raíña Letizia reuniuse o pasado febreiro cunha delegación de Code.org para coñecer o programa educativo estadounidense, que segundo asegurou o representante da delegación busca "eliminar calquera brecha de xénero, salarial ou social".