A primeira visita ao dentista, segundo os odontopediatras pontevedreses, debe realizarse ao cumprir o primeiro ano de vida.
Con esta primeira visita poderanse evitar prácticas prexudiciais para o desenvolvemento da cavidade oral. Ademais, os pais poderán resolver as dúbidas sobre a hixiene e o cepillado e permitirá revisar o crecemento da mandíbula, que os dentes teñan unha erupción correcta e descartar patoloxías como as caries.
Alba Castañé, presidenta de Compromiso e Seguridade dental afirma que a idade dos 0 aos 3 anos é unha idade preventiva onde, salvo que haxa algún problema, débense facer revisións anuais e a partir desa idade diminuír o tempo entre cada revisión "a partir dos 5, durante o período de recambio dentario, as revisións recoméndanse cada 6 meses".
Para chegar ao período de recambio, a protección e vixilancia dos dentes de leite é fundamental xa que "unha boa saúde dos dentes temporais axuda a previr problemas durante a vida adulta", explica Alba Castañé, quen ademais engade que é un erro pensar que como eses dentes van caer non se deben tratar ou coidar, debido a que "Os de leite manteñen o espazo dos dentes definitivos".
Un dos procesos fisiológico ligado ao crecemento da boca é a erupción dental que se produce primeiro coa aparición dos dentes de leite e nun segundo lugar coa aparición dos dentes permanentes.
A odontoloxía para bebés intenta previr problemas nun futuro, axudando ao coidado e desenvolvemento da primeira erupción dentaria. Os primeiros dentes adoitan aparecer entre os 4 e os 12 meses de vida, por iso, recoméndase esta primeira visita ao cumprir o primeiro ano, senón antes.
As recomendacións de Compromiso e Seguridade Dental para manter a boca sa desde a infancia son coidar os dentes desde o primeiro día e unha correcta hixiene e revisións dentais co odontopediatra.
