Os pais dos pequenos que protagonizaron este mércores as imaxes dos máis madrugadores para ver a luz en 2020 son os primeiros que se poden beneficiar da ampliación do permiso de paternidade, que desde este 1 de xaneiro pasa de oito a doce semanas. Terán que gozar das catro primeiras tras o nacemento do neno, seis en caso de adopción ou acollemento.
Así as cousas, a nai disporá de 16 semanas de permiso, mentres que o outro proxenitor terá doce, das que catro deberán ser de forma ininterrompida tras o parto. As oito semanas restantes poderán tomarse ao longo do primeiro ano de vida do bebé e a nai poderá ceder ata dúas semanas do seu permiso ao pai.
No caso de adopción, garda con fins de adopción ou acollemento, cada proxenitor terá un período de suspensión obrigatorio de seis semanas logo da resolución xudicial ou da decisión administrativa de garda. Ambos disporán dun total 16 semanas que terán que tomar de xeito ininterrompido nos doce meses seguintes á adopción e que poderán repartir entre eles.
En 2021 os permisos por nacemento serán de 16 semanas para ambos os proxenitores, iguais e intransferibles.
A ampliación do permiso de paternidade está prevista no decreto lei sobre igualdade laboral aprobado polo Goberno o pasado mes de marzo. A medida terá un custo de 871 millóns de euros en 2020, dos que 705 millóns correrán a cargo da Seguridade Social e os 166 restantes, dos empresarios.
