O cantante e compositor Pau Donés conta a súa loita contra o cancro de colon que lle diagnosticaron en agosto de 2015 no documental Jarabe contra el cáncer que estreará este mércores pola noite a canle #0 de Movistar +.
O fundador de Jarabe de Palo e autor de éxitos como La flaca ou Depende busca desestigmatizar e dar visibilidade á enfermidade e ás súas reflexións neste documental que conta con imaxes filmadas por el mesmo e a dirección de Albert Solé.
O documental mostra como o músico non cesou a súa actividade e tratou de seguir facendo unha vida "o máis normal posible, sen dramas e con realismo", indica a cadea nun comunicado.
Jarabe contra el cáncer é ademais o retrato da loita diaria contra a enfermidade no hospital público Vall d'Hebron, a través da experiencia de Pau, e tamén doutros dous pacientes como Marc e Meritxell e dunha enfermeira, Carol. O obxectivo é "reivindicar o traballo abnegado e a miúdo pouco recoñecido dos profesionais da sanidade pública".
O pasado 8 de febreiro Pau Donés comunicou a través do seu blogue que, un ano logo de sufrir un cancro de fígado e ter "os marcadores tumorais a cero", fóralle diagnosticado "un pequeno tumor" no peritoneo.
O cantante explicou que levaba un ano e medio "estupendo", gozando da familia e do tempo libre, aínda que con moitas ganas de volver aos escenarios, cando se lle detectou o novo tumor, e anunciou a súa decisión de seguir adiante coa súa apertada axenda para o 2017.
A finais de febreiro, o cantante de Jarabe de Palo editará un libro titulado 50 Palos, no que repasa a súa vida, marcada polo suicidio da súa nai, algún fracaso amoroso soado e moitos altibaixos profesionais.
O 10 de marzo sairá á venda o seu novo disco, do que xa viu a luz o vídeo do sinxelo Humo, no que fala dos sentimentos e sensacións que espertou nel a enfermidade. Pouco despois, o 18 de marzo iniciará a xira de presentación deste novo traballo discográfico en México e seguirá por Estados Unidos antes de aterrar en España no mes de maio.
Donés narra nun filme a súa loita contra o cancro
Estrearase este mércores pola noite na canle #0 de Movistar+
