A pandemia do Covid-19 provocou unha redución dos analxésicos, antitusivos e antigripais, particularmente o ibuprofeno e moitos medicamentos OTC, debido ao uso de máscaras e o distanciamento social. Así mesmo, e segundo os datos recollidos polo Observatorio do Medicamento de FEFE, nos últimos meses viuse un aumento da compra de antidiabéticos e os deshabituantes do tabaco debido ao financiamento recibido a partir de xaneiro de 2020.
As causas desta convulsión do mercado hai que buscalas nos cambios de hábitos de vida impostos pola pandemia que inclúen o confinamento, a falta de asistencia dos nenos aos colexios, o uso de máscaras e outros medios hixiénicos e tamén a baixa utilización dos centros sanitarios por temor ao contaxio. Da mesma forma en que determinadas farmacias víronse favorecidas pola proximidade e outras sufriron a caída de turismo, tamén a industria farmacéutica está a verse afectada en produtos de venda estable ou dirixida a colectivos específicos como os nenos.
É especialmente notable a caída no consumo dos antiinfecciosos vía xeral, que comprende os antibióticos, cun descenso do 13 por cento ou os medicamentos do aparello locomotor (antirreumáticos) cunha caída do 8 por cento, "sen dúbida influído polas noticias que desaconsellaban o uso do ibuprofeno na Covid 19".
Menos explicación ten, segundo informaron desde a organización, a caída dos antiarrítmicos do 19 por cento ou os antitusígenos do 15 por cento. "Tamén na actividade diaria das farmacias moitas cousas están a cambiar tanto nas relacións cos provedores como na integración do mundo dixital, coa volta á canle farmacia de moitos produtos, xa que agora é posible facer promoción polos laboratorios con descontos directos ao cliente, e sen aumento da burocracia", dixo o editor do observatorio, Enrique Granda.
Neste sentido desde de FEFE fíxose unha importante aposta cunha empresa, iniciándose este mes unha pilotaxe que haberá de estenderse a máis de 9.000 farmacias, e uniuse á iniciativa proposta ao ministerio de realizar test rápidos nas farmacias para determinar a inmunidade ao coronavirus.
