O actor galego Luís Zahera visitou este mércores o estudio de El Hormiguero xunto a Nathalie Poza para promocionar a segunda tempada de La Unidad, que Movistar+ estreará o próximo 18 de marzo.
Pablo Motos, nun momento do programa, non dubidou en preguntarlle ao santiagués polo seu innegable parecido con Alberto Núñez Feijóo e en recuperar o vídeo de felicitación do Nadal que ambos rodaron xuntos para recibir o ano 2020.
"Era cando empezaba a mega crispación absoluta contra a política, e a min, que voto BNG, chamoume a contorna de Núñez Feijóo para facer unha felicitación de Nadal e fíxeno con boa intención”, explicou Zahera, que facía no vídeo de irmán do aínda presidente da Xunta e candidato a dirixir o PP.
O intérprete tamén recordou que o "queimaron moito" en redes por prestarse para ese traballo, ante o que respondeu que non fixo de Casado "porque non era galego".
O parecido entre ambos tamén foi explotado outras veces en televisión, como fixo no seu día o programa Land Rober.
Zahera tamén lle contou a Pablo Motos que traballou durante 20 anos en Luar e desvelou unha anécdota que lle pasou con Rocío Jurado: tivo que axudala a cruzar unha porta polos "traxes enormes" que lucía "a máis grande".