A crise do coronavirus levouse por diante a xira de verán da Panorama. A pesar de que o Goberno galego está a traballar nun protocolo para garantir a celebración de verbenas partir do 1 de xullo, unha das grandes orquestras de Galicia anunciou a súa decisión "lamentándoo moitísimo e cunha tristeza que nos invade enormemente".
A través dun comunicado, o Panorama explica aos seus fans que ten claro que "a saúde é o primeiro" e que, nas condicións que require a nova normalidade, con limitacións de aforamento e medidas de distanciamento social, non é posible levar a cabo o seu espectáculo.
"Nas nosas actuacións estamos arroupados por milleiros de persoas e un público que participa activamente bailando, saltando, abrazados de xeito conxunto...", continúa o comunicado da orquestra, que tamén agradece ao Goberno galego o esforzo por garantir as verbenas este verán na comunidade.
"Consideramos un acerto por parte da Xunta que non desaconselle celebrar festas populares este verán, como si fixeron outras comunidades, e que estea a acordar un protocolo", indica a Panorama.
