O director xeral da Organización Mundial da Saúde (OMS), Tedros Adhanom Ghebreyesus, pediu aos países ricos unha moratoria ata polo menos finais de setembro para administrar doses de reforzo da vacina do covid-19, co fin de asegurar que se poñan as primeiras en países de ingresos baixos. O obxectivo é que a finais do próximo mes estea vacinada un 10% da poboación mundial.
A OMS maniféstase así despois de que Israel e Alemaña decidisen ofrecer unha dose de reforzo aos seus maiores, mentres que o Reino Unido planea facer o mesmo a partir de setembro e outros países ricos iniciaron esa reflexión.
Neste punto, o organismo advirte de que máis do 80% das vacinas acabaron en países de ingresos altos, a pesar de que concentran só a metade da poboación mundial. "Entendo a preocupación de todos os gobernos de protexer os seus cidadáns do variante delta, pero non podemos aceptar que os países que utilizaron a maioría da subministración das vacinas aínda fagan uso de máis, mentres que as persoas máis vulnerables noutras partes do mundo seguen sen protección", esgrimiu.
Só un 2% dos habitantes de África teñen a pauta de vacinación completa e un 5% recibiron unha dose
"En maio pedín apoio mundial para facer un sprint de cara a setembro co fin de que os países vacinasen polo menos o 10 por cento da súa poboación de aquí a finais de setembro; agora xa chegamos á metade do camiño dese período de tempo e aínda estamos fóra dos obxectivos", alertou o director xeral do organismo.
En maio, os países de altos ingresos administraran 50 doses por cada 100 persoas, pero agora a cifra duplicouse, situándose en 100 doses por cada 100 persoas, segundo advirte a OMS. "Mentres tanto, os países de baixos ingresos inoculan 1,5 doses por cada 100 persoas debido á carencia de vacinas", lamenta.
En concreto, Europa ten vacinada máis da metade da súa poboación, mentres que só un 2% dos habitantes de África teñen a pauta de vacinación completa e o 5% recibiron unha dose.
Para iso, pediu a colaboración de países e empresas que controlan a subministración mundial de vacinas. "O curso da pandemia depende do liderado dos países do G-20", sinalou o director xeral da OMS, que lles pediu dar prioridade a Covax.
Para rematar, recordou que as vacinas non son a única ferramenta para acabar coa pandemia. "Só podemos derrotala cun enfoque integral en combinación con medidas sociais e de saúde pública que sabemos que funcionan", sinalou.
