A Organización Mundial da Saúde (OMS) está a analizar unha nova variante do coronavirus, denominada Mu, que foi identificada por primeira vez en Colombia no pasado mes de xaneiro e da que xa se notificaron casos en países de Suramérica e Europa.
A variante Mu, que se detectou en 39 países, é considerada agora como "de interese" pola OMS, o que implica que se lle fará un seguimento para saber de inmediato se presenta mutacións que poidan modificar a forma en que se transmite, volvela máis virulenta ou reducir a eficacia das vacinas utilizadas na actualidade fronte ao covid-19.
Só no caso de presentar eses cambios, os científicos avaliarán se pasa a considerarse unha "variante de preocupación", das que actualmente hai catro: alfa, beta, gamma e delta. Esta última é a que máis inquietude provoca pola súa capacidade de propagarse rapidamente e porque pode causar unha enfermidade máis severa.
A variante Mu, segundo detallou o organismo de Nacións Unidas, ten unha constelación de mutacións que indican propiedades potenciais de escape inmunolóxico. De feito, os datos preliminares presentados ao Grupo de Traballo sobre a Evolución do Virus mostran unha redución da capacidade de neutralización das vacinas e dos vacinados, similar á observada na variante Beta, aínda que a OMS avisa de que isto debe ser confirmado por outros estudos.
Ademais, e aínda que a prevalencia global da variante Mu entre os casos secuenciados diminuíu e actualmente está por baixo do 0,1 por cento, a OMS avisou de que a prevalencia en Colombia (39%) e Ecuador (13%) aumentou sistematicamente.
"A prevalencia notificada debe interpretarse tendo en conta a capacidade de secuenciación e a puntualidade con que se comparten as secuencias, que varían dun país a outro. Necesítanse máis estudos para comprender as características fenotípicas e clínicas desta variante", detallou o organismo.
