A variante ómicron do coronavirus causante da covid-19 foi xa detectada en 77 países, aínda que probablemente está xa presente en todo o mundo, e estase expandindo "a un ritmo que non viramos en ningunha das cepas anteriores", alertou hoxe a Organización Mundial da Saúde (OMS).
"Probablemente xa está na maioría dos países, incluso nos que aínda non foi detectada", recoñeceu en rolda de prensa o director xeral da OMS, Tedros Adhanom Ghebreyesus, quen manifestou a súa preocupación por que gran parte da sociedade haxa baixado a garda ante esta evolución do virus.
"A xente está a considerar que a variante ómicron está asociada a casos menos graves, pero xa aprendemos antes que subestimar este virus é perigoso", afirmou o experto etíope.
"Incluso se a ómicron causa menos casos graves, un forte aumento dos contagios pode novamente colapsar sistemas sanitarios non suficientemente preparados", alertou o máximo responsable da organización con sede en Xenebra.
Tedros insistiu en que "as vacinas por si soas non van sacar a ningún país desta crise", xa que a transmisión do coronavirus debe enfrontarse por outros medios, incluíndo o uso de máscaras, o evitar lugares concorridos, a boa ventilación ou a hixiene de mans.
"Practiquen todo iso, consistentemente, e da forma correcta", insistiu o director xeral.