Hoxe por ti, Rede de Servizos Solidarios é unha ONG creada na cidade de Vigo co fin de garantir aos veciños unha serie de servizos "importantes para a vida e que non están incluídos na carteira da Seguridade Social". Así o manifestou o presidente da organización, o actor Antonio Durán, Morris, nunha rolda de prensa de presentación celebrada este luns.
O obxectivo do proxecto, explicou, é permitir que "persoas e familias que non poden facer fronte a algunhas necesidades esenciais teñan acceso gratuíto a servizos cun formato que lles permita a súa total integración e dignificación".
"É unha fórmula nova en España coa que tratamos de eliminar o estigma que crea nestas persoas o acudir a locais considerados para pobres", engadiu Ventura Pérez Mariño, socio fundador da ONG.
Así, o labor social da entidade articúlase mediante convenios solidarios con restaurantes, academias, barberías, ópticas ou centros de fisioterapia.
Para Morris "os efectos da crise son aínda palpables, e aínda que é unha cuestión que debe resolver a Administración pública", os cidadáns poden "facer moitas cousas para axudar aos prexudicados".
