A imaxe dunha pelexa entre ratos no metro de Londres foi galardoada polo público como a mellor fotografía do ano nos Wildlife Photographer of the Year. "Pasei 5 días tombado na plataforma así que era probable que ocorrese nalgún momento", explicou o seu autor, Sam Rowley.
"Estes ratos de metro, por exemplo, nacen e pasan a súa vida enteira sen ver a luz do sol. E como hai tantos ratos e tan poucos recursos, teñen que loitar por algo irrelevante como unha migalla", engadiu.
Os dous protagonistas da foto merodeaban polas plataformas en busca de comida cando se atoparon co mesmo anaco de pan, o que desencadeou nunha brevísima disputa antes de seguir os seus camiños por separado.
O director do Museo de Historia Natural do Reino Unido, Michael Dixon, asegurou que a imaxe de Sam Rowley ofrece unha ollada "fascinante" sobre como "a vida salvaxe funciona nunha contorna dominada polos humanos".
