Un grupo extremista islámico estadounidense emitiu este mércores unha "advertencia" aos creadores da serie South Park por incluír ao profeta Mahoma nun dos seus últimos episodios. "Temos que advertir a Matt [Stone] e Trey [Parker] de que están a facer algo estúpido e que probablemente terminarán como Theo Van Gogh", indicaba a mensaxe no portal RevolutionMuslim.com.
"Isto non é unha ameaza", asegura o comunicado, "senón unha advertencia do que probablemente lles pode pasar". Reforzando a velada ameaza aparece xunto ao texto unha fotografía de Theo Van Gogh, o cineasta, produtor de televisión, columnista de prensa e actor holandés que foi asasinado o ano 2004 por un mozo islamita por realizar un curto sobre a violencia contra as mulleres no mundo musulmán.
O profeta do Islam apareceu no capítulo número douscentos do programa, o cal foi emitido o pasado 14 de abril en Estados Unidos, aínda que para evitar problemas e tendo en conta que mostrar a imaxe de Mahoma é unha ofensa na relixión musulmá, os guionistas disfrazárono de oso.
A noticia da ameaza a Stone e a Parker foi recollida inicialmente pola cadea CNN, que cualificou a web con sede en Nova York como “radical islámica” e asegurou que en 2009 foi obxecto dunha investigación xornalística pola “súa retórica en apoio da ‘yihad' contra Occidente e por eloxiar a Osama bin Laden”.
O portal, non conforme coa advertencia, achegou un sermón que pide castigo para os que blasfeman contra a relixión musulmá e un texto que dá a entender que coñecen o lugar de residencia dos creadores da polémica serie de animación.