A vida de Mario Conde, nun documental

O exbanqueiro Mario Conde vese reflectido no novo documental sobre a súa vida, segundo dixo este mércores na estrea, onde tamén recoñeceu que é un "caso raro" que a súa figura siga espertando interese 30 anos despois de converterse en presidente de Banesto, xestión pola que foi condenado a mediados dos noventa.

Mario Conde fixo estas declaracións a Efe momentos antes da estrea en Valladolid deste documental, titulado Mario Conde e asinado polo director valisoletano Rubén Alonso.

O exbanqueiro galego (Tui, 1948) opinou que aos "casos non resoltos o tempo non lles afecta" e considerou que o público segue interesado nel porque "probablemente non se creu todo" o que se contou sobre o que pasou ao longo da súa vida.

Mario Conde definiu a cinta como a "primeira aproximación á persoa", despois de que libros e outros proxectos cinematográficos e televisivos se centraran unicamente no "personaxe".

"Vai chocar e moito a persoa e o personaxe" porque a miúdo a cidadanía ten unha imaxe súa como a dun home "distante", engadiu Conde, quen si se recoñece neste traballo, rodado entre marzo e setembro de 2014, mentres que noutros non se viu reflectido.

"DIÁLOGO SINCERO". Trátase dun "diálogo sincero", considerou o que fora presidente de Banesto desde 1987 ata 1993 e por cuxa xestión irregular, acusado de apropiación indebida e falsidade documental, foi condenado a varios anos de cárcere a mediados dos anos noventa.

O director da película, Rubén Alonso, indicou que, a pesar de que nun principio o exbanqueiro rexeitou participar no proxecto, finalmente accedeu a formar parte desta película que aborda o seu ámbito máis persoal e a súa vida cotiá.

A película elaborouse a modo de diálogo, sen guións, e recolle "de viva voz" a versión de Mario Conde. O próximo 27 de outubro presentarase no Cine Paz de Madrid, que pertenceu á familia da primeira muller do exbanquero, Lourdes Arroyo.